۴۹۰ تنه سرتیري، بریدملان او افسران د پوځي زدکړو له ترلاسه کولو وروسته فارغ شول
د ملي اردو ۴۹۰ تنه سرتیري، بریدملان او افسران د پوځي مهارتونو له زدکړې وروسته د ګډو محاربوي زدکړو له قوماندانۍ څخه نن فارغ شول او د فراغت سندونه یې ترلاسه کړل. ددغو اتلانو د فراغت مراسم د ګډو محاربوي زدکړو د قوماندانۍ د سرپرست ډګروال "عبدالظاهر بارز"، د ملي دفاع وزارت د افسرانو او ددغې قوماندانۍ د ښوونکو په ګډون ترسره شول.
په دغو مراسمو کې د ګډو محاربوي زدکړو د قوماندانۍ سرپرست ډګروال "عبدالظاهر" وویل چې دغو ځواکونو په یاده روزنیزه دوره کې، له بیلابیلو وسلو د استفادې لپاره لازم مهارتونه او جنګي تکتیکونه ترلاسه کړي دي او اوس مهال په بشپړ ډول چمتو دي څو د خلکو له ځان او مال څخه په جدي توګه دفاع وکړي.
فارغانو د افغانستان د خلکو د آرامتیا او ټیکاو د دښمنانو پر وړاندې د صادقانه مبارزې ډاډ ورکړ او ټولو په یوه غږ هېواد ته د خدمت کولو چمتوالی وښود.
