د کندز د خان آباد ولسوالۍ بريد په تړاو د ملي دفاع وزارت اعلاميه
وسله والو طالبانو نن ترغرمې وړاندې د کندز ولايت خان آباد ولسوالۍ "نيکپاى سيد رمضان" سيمه کې د امنيتي ځواکونو پر پوستو بريد وکړ، امنيتي ځواکونو په دفاعي حالت کې ځوابي بريد ترسره کړ چې په پايله کې يې د قاري عبدالرازق او مولوي عباس دمرستيال په ګډون تر 30 ډېر ترهګر ووژل شول او د فيضاني او قاري ابراهيم چې په حظيفه مشهور و د دوو قومندانانو په ګډون اته وسله وال طالبان ټپيان شول.
همداراز دغه بريد کې د وسله والو طالبانو څلور موټر، اته موټرسايکلونه او ګڼ شمېر وسلې او مهمات هم له منځه يوړل شول. د لومړنیو راپورونو په اساس په دې پیښه کې ملکي کسانو ته زیان نه دی اوښتی، د ملي دفاع وزارت په دې پیښه کې ملکي کسانو ته د زیان رسیدو په اړه څېړنه کوي او د خپلو څېړنو پايلې به له خلکو سره شریکې کړي.
