د ملي دفاع وزارت سرپرست وزير د کونړ ولايت د دانګام ولسوالۍ اړوند فرضي کرښې کې له ميشت ټولي او نوي جوړيدونکي پل څخه ليدنه وکړه
د ملي دفاع وﺯارت سرپرست وزير مولوي محمد يعقوب “مجاهد”، د ۲۰۱ خالد بن وليد (رض) قول اردو قوماندان مولوي عبدالصبور ابودجانه او د ګڼ شمېر مسؤلينو په ملتیا نن ماسپښين د کونړ ولايت دانګام ولسوالۍ اړوند فرضي کرښې بينشاهي کنډو کې ميشت ټولي او هلته له نوي جوړیدونکي پوستو او پل څخه ليدنه وکړه.
د ملي دفاع وزارت سرپرست مولوي محمد یعقوب مجاهد مجاهدينو ته د هيواد له پولو او ځمکنۍ بشپړتيا څخه د دفاع په برخه کې لازمې توصيې وکړې او د نورو پوستو جوړولو سربيره يې د هر اړخيزه امکاناتو او اکمالاتو ترسره کولو ژمنې هم وکړې.
ورته مهال قومي مشرانو هم له قدرمن وزير مولوي محمد يعقوب مجاهد او نورو مسؤلینو څخه مننه وکړه او زیاته یې کړه چې په هر ډول حالاتو کې زمونږ غوښتنو ته رسيدګي کړيده.
