د وسلوال پوځ لوی درستیز د ۲۰۱ خالد بن ولید قول اردو د ۶۳۳ تنه سرتيرو په فراغت غونډه کې ګډون وکړ
د وسلوال پوځ لوی درستیز مولوي فصيح الدين «فطرت» د ملي دفاع وزارت د ۶۳۳ تنه سرتیرو په فراغت غونډه کې ګډون درلود، چې د ۲۰۱ خالد بن ولید قول اردو له ښوونيز مرکز څخه د ۲ مياشتو پوځي، مسلکي او عقيدتي زده کړو وروسته فارغ شول.
د فراغت په دغه مراسمو کې د وسلوال پوځ لوی درستیز، د ملي دفاع وزارت د تعليماتو او پرسونل مرستیال، د ۲۰۱ خالد بن ولید قول اردو رهبري او د اسلامي امارت نورو مسوولينو هم ګډون کړی وو.
د وسلوال پوځ لوی درستیز د اسلامي امارت د سرښندونکو سرتيرو څخه د مننې ترڅنګ وويل: ډير د خوشحالۍ ځای دی، چې د ملي دفاع وزارت ځواکونه په لوړه هېوادنۍ او اسلامي انګيزې او روحيې سره د هېواد له ځمکنۍ بشپړتيا څخه دفاع کوي او هېڅ پردي پاله مزدور ته د هېواد په داخلي چارو کې د لاسوهنې اجازه نه ورکوي.
د وسلوال پوځ لوی درستیز يوار بيا له ټولو هغه هېوادوالو څخه چې بهر ته تللي دي، هېواد ته د راتګ بلنه ورکوي تر څو په عزت سره هېواد ته راستانه شي؛ اسلامي امارت د هېواد د ټولو شريفو خلکو د ساتنې او هر اړخيزې مرستې ته ژمن دی.
