د وسلوال پوځ لوی درستیز د پېژندتون ریاست په سیمینار کې ګډون وکړ
د وسلوال پوځ لوی درستیز الحاج قاري محمد فصیح الدین "فطرت" د ملي دفاع وزارت اړوند معینتو، ریاستو، سیمیزو قول اردوګانو، لواګانو اونورو جزوتامو د پېژند ۲۴۰ تنه مدیرانو او آمرینو ته د ظرفیت لوړولو لپاره د پېژندتون ریاست له لوري په جوړ شوي درې ورځني سیمینار اختتامیه مراسمو کې ګډون وکړ.
د وسلوال پوځ لوی درستیز الحاج قاري محمد فصیح الدین "فطرت" پخپلو خبرو کې وویل: اسلامي نظام یوې منظمې او مسلکي اردو ته ضرورت لري، زموږ مسؤلیت دادی؛ چې داسې یوه نظامي او مسلکي اردو وروزو چې له عقیدوي او نظامي اړخه برابره وي او ددې اردو د جوړولو لپاره پېژنتون ریاست د ملا د تیر حیثیت لري.
همدا راز د یاد ریاست رئیس مولوي محمد رحیم د سيمینار ټولو ګډون والو ته د لازمو توصیو او د دوی د کارونو د ستایلو ترڅنګ زیاته کړه: چې نیتونه مو خاص د الله جل جلاله رضاء وګرځوئ، خپل کارونه په اصولي توګه مخ ته یوسئ په کارونو کې ځنډ مه کوئ خپل کارونه په خپل وخت ترسره کړئ، کوشش وکړئ چې خپل کشران مجاهدین درڅخه خفه نشي.
غونډه د مسؤلینو له لوري څو تنو د پېژند اړوند مديرانو او آمرینو ته د دوی ښه خدمت او په کارونو کې اولویت ته په کتو د تقدیرنامو او نغدي جایزو په ورکولو سره پای ته ورسېده.
