د ملي دفاع وزارت له لوري د هېواد د عامې روغتیا وزارت ته د ۶۰۰ زره خریطو "مکس سیرومونو" د ورکړې هوکړه لیک لاسلیک شو
د ملي دفاع وزارت لومړي مرستیال او سرپرست شاه محمود "میاخیل" د ملي دفاع وزارت د لوژستیک په عمومي قوماندانۍ کې د عامې روغتیا له سرپرست وزیر سره ددغه هوکړه لیک د لاسلیک په مراسمو کې وویل: له نیکه مرغه د ملي دفاع وزارت د صحي برخې په نوښت او ددغه وزارت د رهبرۍ په لزوم دید یو لوی شمېر سیرومونه د عامې روغتیا وزارت ته سپارل کیږي، تر څو د ناروغو هېوادوالو د درملنې په برخه کې ترې ګټه واخیستل شي.
د عامې روغتیا سرپرست وزیر وحید "مجروح" د ملي دفاع وزارت له لوري یاد وزارت ته د مکس سیرومونو په ورکولو سره قدرداني وکړه او زیاته يې کړه: ډاډ درکوم چې دغه سیرومونه به په ټول هېواد کې د مستحقو ناروغو هېوادوالو ته ورسیږي.
دا سیرومونه چې هر یو يې ۵۰۰ ملي لیټره وزن لري، ټاکل شوې چې د ۶۰۰ زرو ناروغانو په روغتیا کې به ترې ګټه واخیستل شي.
