د ملي دفاع وزارت سرپرست مولوي محمد یعقوب "مجاهد" مالیزیایي پلاوي سره وکتل
نن ورځ د مالیزیا هیواد ځانګړي استازي او د بهرنیو چارو، کورنیو چارو او دفاع وزارتونو استازي د یو سفر په ترڅ کې کابل ته سفر وکړ او دلته یې د ملي دفاع له سرپرست وزیر مولوي محمد یعقوب "مجاهد" سره پخپل کاري دفتر کې وکتل او خبرې یې وکړې.
په دې کتنه کې د ملي دفاع وزارت سرپرست راغلي پلاوي ته ښه راغلاست ووایه او په مالیزیا هېواد کې له افغان مهاجرینو سره د مالیزیایي خلکو او دولت د ښه چلند او له افغانستان سره د دغه هېواد د اوږدمهاله اړیکو یادونه وکړه او ویې وویل: مالیزیا یو پیاوړی او لوی اسلامي هیواد دی، هیله مند یم چې دغه تګ او راتګ لا پیاوړی شي.
په دې جریان کې د ملي دفاع سرپرست وزیر مولوي محمد یعقوب "مجاهد" مېلمنو ته د اشغالګرو پر وړاندې د افغانانو د سرښندنو، قربانیو او د دغه هېواد د اوسني وضعیت په اړه معلومات ورکړل او زیاته یې کړه: چې له نېکه مرغه د اسلامي امارت په راتګ سره په هیواد کې اشغال له منځه تللی او جګړه په بشپړه توګه پای ته رسېدلې ده او په ټول هیواد کې سرتاسري امنیت رامنځ ته شوئ دی.
د ملي دفاع سرپرست وزیر دغه پلاوي ته پخپلو خبرو کې وویل: چې په افغانستان کې د داعش په شمول هیڅ یوه ډله په فزیکي ډول وجود نه لري او اسلامي امارت به هېچا ته اجازه ورنه کړي، چې د افغانستان له خاورې څخه ګاونډیو او سیمې هیوادونو ته ګواښ او تهدید رامنځ ته کړي.
په پای کې دغه پلاوي افغانستان او مالیزیا دوه دوست هیوادونه وبلل او پر هر اړخیزو همکاریو یې ټینګار وکړ او ډاډ یې ورکړ، چې په افغانستان کې یې څه لیدلي د خپل هیواد لوړ پوړیو مسؤلینو ته به یې ورسوي.
