اندونیزیايي پلاوي د ملي دفاع له سرپرست وزير سره په لیدنه کې: "هغه څه چې موږ په رسنیو کې اوریدلي، تبليغات وو"
د ملي دفاع سرپرست وزير مولوي محمد یعقوب "مجاهد" نن په خپل کاري دفتر کې اندونیزیا د جمهوري رياست له پخواني مرستيال ښاغلي محمد يوسف کالا، د اوسنۍ سرې میاشتې او جوماتونو شورا له رئیس او مل پلاوي سره وکتل.
په دې کتنه کې د ملي دفاع سرپرست وزير راغلي پلاوي ته د ښه راغلاست تر څنګ وويل:« افغانستان او اندونیزیا ډېر مشترکات لري، موږ لېواله یو، چې د دواړو اسلامي هېوادونو ترمنځ په بېلابېلو برخو کې اړیکې او همکارۍ لا پراخه کړو».
اندونيزيايي پلاوي افغانستان ته د خپل سفر په دوام کې د امنيت او بيارغونې په اړه واقعيتونه څرګند او زياته يې کړه: هغه څه چې موږ د افغانستان د امنيت او نورو موضوعاتو په تړاو په رسنيو کې اورېدلي، تبليغات وو؛ بلکه امنيت د تامين او په اقتصادي برخه کې ډېر کارونه شوي، د اندونیزیا هېواد چمتو دی، چې له افغانستان سره په بېلابېلو برخو کې همکاري او پانګونه وکړي.
