د شهید تورنجنرال مزمل ساپي د کورنۍ له غړو سره د وسله وال پوځ لوی درستیز او د ملي دفاع وزارت سرپرست لیدنه
د وسله وال پوځ لوی درستیز او د ملي دفاع وزارت سرپرست ستر جنرال محمد یاسین "ضیا"، د ۲۰۵ اتل قول اردو د لومړۍ لوا پخواني قوماندان شهید تورنجنرال مزمل "ساپي" د کورنۍ له غړو سره نن له غرمې مخکې د خپل کار په دفتر کی ولیدل.
په دې لیدنه کې د شهید تورنجنرال مزمل "ساپي" د کورني غړو د ملي دفاع وزارت د رهبرۍ له هراړخیزو مرستو په ځانګړي توګه د ملي اردو د شهیدانو کورنیو ته د رسیدنې او ځانګړې پاملرنې او لاسنیوي په برخه کی مننه او قدرداني وکړه.
د وسله وال پوځ لوی درستیز او د ملي دفاع وزارت سرپرست سترجنرال محمد یاسین "ضیا"، شهید تورنجنرال مزمل "ساپی" په وطن مین او د میړانې ریښتینی شهید یاد کړ او وې ویل: د ملي دفاع وزارت او ستر درستیز مشرتابه ستاسو په دې غم کی ځان شریک ګني او تل هڅه کوو ترڅو د دفاعی او امنیتی ځواکونو د شهیدانو حقوق او امتیازات له ځنډ پرته د دوی محترمو کورنیو ته په خپل ټاکل شوي وخت ورسیږي.
